आज (२५ एप्रिल २०२०) परशुराम जयंती आहे. दर वर्षी या दिवसापासून चिपळूण (जि. रत्नागिरी) येथील श्री क्षेत्र परशुराम येथे तीन दिवसांचा उत्सव सुरू होतो. यंदा मात्र करोनाच्या संकटामुळे लागू असलेल्या संचारबंदीमुळे त्यावर निर्बंध आहेत. त्यामुळे देवस्थान ट्रस्टने आजच्या दिवसासाठी ऑनलाइन दर्शनाची सोय उपलब्ध केली आहे.
भाविकांनी फेसबुक लाइव्हच्या माध्यमातून श्री परशुरामांचे ऑनलाइन दर्शन घ्यावे, असे आवाहन देवस्थान ट्रस्टतर्फे करण्यात आले आहे. दर्शनासाठी
येथे क्लिक करावे.
श्री क्षेत्र परशुराम :सात चिरंजीवांपैकी (ज्यांना मृत्यू नाही असे) परशुराम म्हणजे भगवान विष्णूंचा सहावा अवतार मानले जातात. पश्चिम दिशेचे संरक्षणकर्ते म्हणून ते कोकण किनारी वास्तव्य करून आहेत. काश्यप ॠषींना पृथ्वी दान करून स्वतःसाठी समुद्राला मागे हटवून अपरान्त भूमीची म्हणजेच कोकणाची निर्मिती करणाऱ्या श्री परशुरामांचे हे प्राचीन मंदिर आहे. चिपळूणहून मुंबईकडे जाताना घाटाच्या माथ्यावर श्री परशुरामाचे देवस्थान आहे. महामार्गापासून उजवीकडे देवस्थानाला जाण्यासाठी रस्ता आहे. आदिलशाहीत जीर्णोद्धार केलेले हे मंदिर आहे. खाली उतरतानाच्या जांभ्या दगडांच्या पायऱ्या (पाखाडी) जावळीचे चंद्रराव मोरे यांनी सुमारे ३०० वर्षांपूर्वी बांधल्या आहेत. परशुरामाच्या या मंदिराच्या रचनेमध्ये आदिलशाही वास्तुकलेचा प्रभाव स्पष्टपणे जाणवतो. विशेषत: मंदिराचा घुमट या पद्धतीचा आहे.
